Sa Veridade
de Salvatore Poddighe


Una campura de bellas ispigas,
totu ingranidas in colore ‘e oro,
sun pro s’umanidade unu tesoro
chi cumpensat suores e fadigas.

Gasi iscrittos in pàginas e rigas
sos bellos versos de su Logudoro,
in èpocas modernas e antigas
sunu tesoros ch’allegran su coro.

Ma sunu pestes chi su coro umanu
attristan tantu e ponen in dolore
sas ispigas siccadas senza ranu.

Su matessi in disgustu e malumore
ponet su coro unu cantu mezzanu
in versos senza metru, né valore.