Sa pitzinnia
di Larentu Pusceddu

Sa pitzinnia
ti cuerrat
che manta caentosa
cando sa frocca
in sos ierros
cucuzat de biancu
su samben de sas teulas
e sos campos
paren unu mare de nie
e Naschit
Nanniseddu
in su fenu de sa loza;

Sa pitzinnia
t’infriscat
che frina
a serentina
in sos istios
cando dae sas carredas
si pesan sos contos
a su chelu,
pro ammerare
luche a sos isteddos
e che pantumas allegras
isparin a sa prima ingalenada;

Sa pitzinnia
est sa forza de sos disizos
chi aunin su semen
in su surcu
pro chi su fruttu
diat prosperidade
e crescat in sa terra
s’Umanidade noa.

B’at tempus
pro pensare a sa betzesa
chi s’iscrontiat *
allargu
che-i sa luna
in nottes de iscuru,
anneuladas.

* Intravede, scorge, distingue

4° premiu Citta di Ozieri 2007

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!