Sa Giogalza
di Nino Fois

Passende in sa carrela affritturìda
cun sa munnedda tott’istratzulada,
a s’iscultza, mi l’apo sonniada,
mi fit cantende a cantone sighida,

a boghe selèna e fiorida
chi totta s’isparghiat in s’arcada
de chelu, lughende che un’arvada
chi ferit sa terra allentorida.

Fit bendende: - Gioghitta, giogamanna! –
A còrvula a cùccuru piena,
imbarende un’iscutta in donzi gianna

Giaros sos ojos che s’abba ‘e s’ena,
in s’andànta istrìzile che canna,
tuccaìat a boghe de sirena:

- Gioghitta, giogamanna…
- Gioghitta, giogamanna…-

Custu sonette est cantadu dae su coru Logudoro de Usini e dae su coru de Uri e àteros coros