Sa Filadora
di Minnia Pani

In d’ unu trighin’ iscurigosu
S’ antiga feminedda filadora
sa chiza de sa cara chentza gosu
Setzida filende a cara a fora
Sos ojos ischeados, ingullidos
Fin de prata sos pilos incanidos.

E istaiat filende a manzanile
Foscighend’a murrocula su fusu
Issaliat sa man’ in mutzighile
Pro girare sa rucca de piùsu
Filaiat cotone lan’e linu
A s’indonu a totu su ‘ighinu.

E cuss’ ezzitt’ antiga filadora
No b’ est piùs in cussu giannile
Setzida filende a cara a fora,
filende su manzan’ a s’impuddile
E cantaiat sos muttos e sos gosos
Cantos antigos bellos religiosos.

Ma calchi muttu mi l’ hat insinzadu
Chi canto medas bias finta como
Ammentendemi su tempus passadu:
a sa cua rupia cussa domo
impostu m’haian sa marrania
sa filadora fit bisaja mia.

SCANO MONTIFERRO /2001/ ATESTADU DE PARTECIPAZIONE