Sa die Europea de sas Limbas
de Anna Maria Sechi

Sas limbas sunt su bene infinidu,
Biada chie las podet faeddare,
In totue benit semper retzidu
E s’aberint sas giannas pro intrare!
Sena mai si sentire mìschinu
Ca podet cun totus arrejonare
Ma bind’at una ebbia ch’est eterna
Pro totus est sa limba materna!

No ischire sa limba in terr’anzena
Vividu nd’apo deo su dannu,
Pariamus totus presos a cadena
Dae su prus minore a su mannu
In coro nd’aimis una pena,
Nche orfanos de Deus sen’ispannu!
Ca sas limbas sunt sacru evangelu (i)
Si non faeddas ti serrant su chelu!

A s’isula furadu ant sa corona
Fatende.la teracca in domo sua
Isfrutadu nd’ant gai sa gente ‘ona
Chi su sardu faeddaiat a s’accua
Diventada de issa sa padrona
Roma si l’at papada cota e crua
Como, pro nd’acontzare totu
Non bastat mancu s’innu patriotu!

Sa limba sarda est oe moribunda,
In baddes e montes olvidada
In mesu mare giuta si l'at s'unda
Ca s'italica limba l'at truncada!
Su tocu sonadu l’ant a trumba
In terra sua etotu cundennada!
A pustis de s’ingiusta sepoltura
Torret sa limba sarda prus sigura!