SA DIE DE SOS MORTOS

Sa campana est sonende lentamente
a tocos de agonia e de currutu,
in cust'ora nos torran a sa mente
sos ch'amus prantu in altu e a sucutu,

sas oras tristas, sas dies de lutu
passadas pianghende 'onzi parente
cando sa morte inesorabilmente
sos menzus ornamentos at distrutu.

Chin d'una trista rughe a cabitale
suta unu fossu 'e metr'e mesu
consumit carre e ossos su mortale.

Eco, sa gelosia puntigliosa
s'oro usurpadu e a cua mantesu
benin a consumire in d'una losa.

Antonio Maria Pala (Torpè)

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!