Sa bingia de Antiogu parit arricamada.
onnia fundu ,onnia giuali est beni assestau,
de misura e distantzia arrespetosu
comenti arricamus de tialla antiga
Custa bingixedda est una meravillia
Antiogu e Atongiu dda traballant impari.
Antiogu pudat e marrat
Atongiu spratzinat is coloris.
Su birdi, s’arrubiu, su colori ‘e oru
Ma su miraculu prus bellu
est s’axina.
Perlas pretziosas,
nieddas e de oru,
lucidas, perfetas,
apicadas de manus de un’artista.
Sa bingia parit imoi
unu quadru de su Canaletto,
pintori famosu de paesagius incantaus.
Casi dispraxit a scuncordai
cussas operas de sa natura
Custa prima binnenna de sa vida mia
m’ at incantau.
Su prexeri de cussu ispantu,
sa bella dì de soli,
sa bella armonia
e sa bella cumpangia,
m’ant prenniu su coru
de tranquillidadi e de paxi.

1° Premio Poesia in sardo Concorso Letterario “Noi e gli altri” 3^ edizione – 2017 Sestu