Sa bellesa ‘e custu nidu,
su calore ‘e unu ranu
est amore fittianu
pius de s’oro bramidu.

Su chelu no est serenu,
impestadu est ogni mare
e pitzinnos manizare
bido armas cun velenu,
si de luas est pienu
ogni monte, riu e lidu,
cale bisu as pissighidu
ómine de faltzas bramas,
a bi pensas chi no amas
sa bellesa ‘e custu nidu!

Non ses Deu e non ti seras
chi sa falche messadora
impittas ottora-ottora
ca presentas chen’isperas
ojos malos de sas feras.
A sa lughe ‘e su manzanu
non t’abbizas de s’arcanu
chi dat gosu a custu mundu
e chi naschet in profundu
su calore ‘e unu ranu?

Est istrina sa natura
chi dat coro e passione
a su cantu ‘e su puzone,
no istentes, pone cura
a sos risos ch’as a fura
ca fiores de s’‘eranu
chi carignas cun sa manu
chen’abba si sun sicchende
e si galu ses riende
est amore fittianu.

Coloradas mariposas
ti las ammentas in bolu?
Chena nuscos non nd’as dolu
de sas abes e de rosas?
E su sabore ‘e sas cosas
non che ponzas in olvidu
ca de fruttos as godidu
in custa terra ‘e incantu
po chi sigat cust’ispantu
pius de s’oro bramidu.

Segundu Prémiu – Setzione A – Poesia in rima - Prémiu de poesia in limba sarda “A pes de Santu Padre” – VI Editzione Bortigale 16 de Sant’Andria 2019