S’Inditu
de Maria Luisa Pisanu

"In punzu non l'inserrasa su 'entu
e s'abba non la frimmas cun sa manu;
su mundu no es fatu 'e solu pranu
e s'alidu si proada in pigada;
si sa carena zughes allenada,
arrivas a sa punta chen'istentu".

Custos faeddos los appo in ammentu
dae pizzinnu e, pro medas annos,
intesu appo, in bucca 'e sos mannos,
sentenzias prus tostas de sas taulas,
oe, invece, a sos zovanos sas faulas
còntana e los pònene in turmentu.

Prenos d'isperas, chircan, cun apentu,
cada calanca' inue si ch'intrare,
diventan bezzos, chena triballare,
ca 'onzi zanna agatana cunzada:
sa crisi, chi creimis fit passada,
raighinas at postu in su cimentu.

Arzien sa 'oghe e fetana chimentu,
sa bandela non pesenen de sa resa,
si de campare tenen sa pretesa
e su triballu isetan pro diritu,
de sos bezzos ascurtene s'inditu,
dae sa fadiga bòghene alimentu.

3° Premio "Zellacchinu-Pittalis" - Nuoro, S. Giovanni 2013