“S’idea ’e Deus su crere…su non crere“

Donzi manzanu cando s’arbeschida
torrat a colorire chelu e terra,
sas dies assegurant menzus perra
promittindenos bramidas dultzuras,
lusingant timoridas criaduras
a gosare sos benes de sa vida.

S’armonia ’e s’eternu firmamentu,
movidu semper da pretzisu ordinzu,
ischidat intro mente su lughinzu,
ispantadu mi pregunto donzi orta,
proite custu mundu a fune isorta
non movet, chena sapidu talentu.

Amparu e sientzia a sa naschida,
totu retzimos cun matessi parte,
sos aranchidos ch’istrapatzant s’arte
s’andera sinnalada no ant segura,
sighinde isacheos e disaura,
avvolotant amorosa creschida.

Presumidas sunt zenias umanas,
si cherent manizare chelu e terra,
crispas angustias e cuntierra,
iscrissant su connotu movimentu,
sole e luna bessinde a passu lentu
sunt prodizu de fortzas soberanas.

Intragna briva de tzeleste lughe,
est notte tramuscada chena ispera,
si anneulant sos sinnos de s’aera,
atropellat su tempus mesuradu,
mescas a chie ancora no at pensadu
a s’apretu de sa terrena rughe.

Omine, in manu a Deus ti asseguras
rennessida de bisos e disizos,
ant esser prus seguros sos manizos,
no imboloppant fartas e mancantzias,
creschent fide sana e isperantzias,
sintzeras fadas paigadu curas.

Istimande caridade divina,
ti sullevant cossolu e su corazu
e congrues s’ inghitzadu viazu,
cumprinde cun s’azudu onzi faina.

(Manzanile)

Giovanni Antioco Mura
Ilartzi, su 27 ’e triulas 2005