S'EMIGRAZIONE
di Luca Doddo

A Efiseddu Pau

Nara, Efiseddu, apenas arrivadu
calchi cassa de birra ch'est colada!?
Ca t'an sos cumpanzos visitadu
da ch'ischid'an sa tua rientrada.
E t'an aere sas novas dimandadu
de cust'Isula nostra abbandonada,
e so siguru chi bi lis as nadu
chi s'Isula est benzende a mal'istadu.

In tota canta s'Isula Ichnusa
sono restende sas campagnas solas
prite sas menzus forzas sardignolas
d'emigrare lontana s'est illusa
ma si s'Isula tua che la imbolas
cando rientras l'agatas cunfusa,
senza su bestiamine distrutu
agatas sos terrinos senza frutu.

Va bene chi bos sezis emigrados!
pro cale iscopu? si potet ischire?
ca bos at una mama abbandonados
e custrintu bos at a bos fuire?
ma potides pensare e presumire
ch'agatades sos benes consumados
e nd'est a bider si l'azis trivagliadu
su ch'azis perdidu e su ch'azis lassadu.

Oltres su bene chi est imboladu
trivagliadu bagnendebos sos chizos,
emigrende un'omine isposadu
chi lassat sa muzere chin fastizos
ca da chi si est su babbu allontanadu
ite piega leana sos fizos?
partin pro contu insoro senza frenu
dae ch'esser su babbu in logu anzenu.

E i sos fizos de Guglielmone?
bene los tratan o a donzi manera?
penso: sos anzianos de trinzera
s'an ammentare calchi ocasione
ca in s'italiana frontiera
fatu b'an una bolla de sabone
anzis su colpu duru, forte e grave
l'an tentu in s'atacu de su Piave.

Non bos faeddo de tempos antigos
però de baranta'annos narrer poto,
dae su bindighi a su degheoto
chin sos tedescos fimus inimigos
e oje sezis bennidos amigos
ma ischiavos insoro bos dennoto,
sinde faghen sa befa e sinde rien
e in sas bassas rigas bos iscrien.

Bastet! bos tocat de fagher sos surdos
pro evitare calchi chistione,
bos traten de legitimos o burdos
bos tocat de lis dare sa rejone
ca sono prepotentes e ingurdos
finzas fora 'e s'insoro nassione
e menzus como in sas domos insoro
bos faghen campare a creba coro.

(Torpè)

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!