|
Rosas
imbreagas
Rejas de nues
cascan
in s'aera abbidrada de gennarzu.
Su frittu iscurrizat
in mudines de falche:
sas paraulas sun imbojadas,
e frueddas noellas
pius non mi rebuddin
in sos rizolos suttos de su coro.
Astriada
in sos jerros de s'anima,
dia cherrer torrare
a s'alenu 'e su 'iddizzolu,
a sas domittas de griju,
a bier s'abba 'e su puttu
ue est ballende sa luna tramposa.
In custu cuzone anzenu
brottan solu rosas imbreagas
in iscāndulas de pedra niedda.
Che columba liera dia cherrer fuire
da-e sa runda 'e custa cobertura.
Mai mendada.
Mondina Sechi
(Sassari) |
