PUDDEDROS M’INTENDO REBERDES
(A Pedru Mura)

Cale sorte...cale!

Muen sos bentos pitzinnos
nottesta
a s’alzada ‘e sa Luna
e in coro
puddedros m’intendo reberdes
su pannu currinde ‘e s’amore.

Sa notte s’est fatta lugura.
S’atunzu s’est fattu majia.

Ohi dìccia, sa mia!

Neulaghes de fogu
sos ojos m’alluman tudados,
trainos d’umore
sas venas frittidas m’aundan
in t’’ider, donosa, torrende
cun risu infustu ‘e lentore
a ue as connottu s’amore.

E deo pius non creia
ch’’Eranu potterat brotare!

S’est canu su tzuffu
e grae su passu
b’at galu in s’atunzu ‘e sa vida
fiores de mele auppados
e abes cun alas d’accisu
che tue amorosas...divinas.

T’accùrtzia...m’astringhe...
Oh fortuna!
Nottesta prus manna est sa Luna.

Antoninu Rubattu

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!