Tres ulibos tenzo in su giardinu
Unu est postu indunu vasu ‘e terra
Su secundu est creschenne induna serra
Su terzu est in s’oru ‘e su caminu.

Boccan ulibas birdes e nigheddas
Chi no arriban mai a drempire
Una mariapicca bi rebbottat donzi die
No l’ istrean sas menzus trappuleddas.

Coccone cunnidu chin michina
Coeteddos e minzas sas bombettas
L’appo propostu de rezzettas
Po l’ isfrattare cantu prima.

Bidu chi su remediu pariat vanu
E non beniat bene de attera manera
Pro no ammainare sa pandera
L’appo isparada eris manzanu.