Pro sos chent’annos de Gaspare Mele
di Giuseppe Concas

Mele as de granitu fundamentu
deghe deghinas metros de pianos
tempera de ferru e pilastros sanos
fortes che colonnas de cimentu.

che su colosseo ‘e sos romanos
anfiteatru de cumbatimentu
che Anton’Abate in su cumbentu
lompas Santu chentu e chimb’annos.

Poeta de fungudu sentimentu
vividu cun valores cristianos
lucidu ‘e mente de bonas manos
maduru e omine ‘e talentu.

Custu compreannu faghes chentu
in groria sos tuos t’eten ranos
prite sos zenitores antzianos
an dadu a sos fizos nutrimentu.

Fadiga suore ‘onzi momentu
tempos bonos e tempos metzanos
Gaspare Mele c’as sos pilos canos
ti an’a faghere unu monumentu.

Peppe Luisi e Maria Ladu
ti auguran annos de piusu
ei sa poesia sempre in’usu
a su populu sardu sempre dadu.

Bolotana, 13-04-2011