Naves e trenos che leana ancora
sa zoventude nostra isfortunada
babbos e mamas sun’ a man’arzada
a issos saludenne c’annan fora
in Sardigna non luchet’aurora
non colat mai sa longa nottada
su sole a nois pius non caentat
sa zente anzena illuminat e tentat

Timorosa e iscura est s’aurora
mudas sunu sas predas aspettenne
sos pedes chi las fini cathichenne
luntanos sun da s’issoro dimora
sas voches chi s’intennen a dogn’ora
sono de vezos a issos giamenne
su male anticu mai cunfessadu
de s’intragna Sardigna t’at privadu

Sempere sa vallizza est preparada
piena est de sognos affogados
intro e coro bios affannados
leat su ventu de domo orfanada
sa luna crara s’aera isteddada
de solidade si sunu bagnados
sard’ammentanne s’alligra istajone
canno zumpavas che alligru anzone

Agustu, 2015