candu banderas nieddas
annuant su celu,
e ogus bonus de pipius,
prenus de sonnus e de prantu,
s’accherrant, che umbras de perda,
a undas de mari allenu ?

Calat su scuriu
in sa terra de ferru arropada
chi donat trigu abboau de odiu antigu,
sa vida est fragili, che alas de mariposa,
po non sunfriri
si depit imparai a bolai.

Illusionis sinnant surcus
in su coru allisau de tzaulus de cani
e de pampa de soli siccau.

Ma, or’oru de s’arriu de plata
aundi is alinus s’imprassant
che sposus noeddus,
is arregordus segant is lacanas
mudas de su celu
e scimingiant prus de s’aromu
d’ogna essenza ‘e sa terra.

Canta fardarolu, canta forti!
ca innoi sa morti zerriat morti,
ma intramat puru bisu lebius
de luxi.

Si mi donas sa manu
impari abettaus su primu alidu ‘e soli
chi a palas de sa punta ‘e su monti
oberrit unu mengianu nou.

Menzione d'Onore all'VIII edizione del Concorso di poesia "Quartucciu" - 2018