Poete …in frinas
de Giuanne Chessa

In frinas si movent sos ervatos
naschìdos intre labide allisada,
pilisende cuss’ùltima pasada
chi d-onzi òmine faghet cossumidu,
su tempus ch’est in presse t’at sighidu
aparitzende rànchidos recatos.

E lughinzalos, donu de lugores,
istudant de repente o los abiant,
cazant, infritant làmbriga e gutziant
cussa mazin’ ‘e s’ùltimu retratu,
inzinugrant de rosa s’‘irde ratu
allizendeli brámidas in frores.

Illepiant s’alénu trist’e grae
chin carignos a coros sucutende,
e pesant teju in oras ch’avreschende
ant assutadu làmbrigas in ojos,
e sighint bentizadas in abojos
de nueras ch’abérint torra prae.

Lacheddant…s’aposentu fraigadu
da’ umbe furant ùltimas ninnias,
ch’as pintadu intre laras, cando vias,
iscanzias chin versu chi rasais,
tando in bentos ancora non bolais
ne pessais a s’ùltimu fundagu.

Lépias Frinas in sinu t’ant tratesu
asselenadu in coro e non prus solu,
lìeru dae prantu gosu e dolu
intre cusseltos dìligos d’ammentos,
ch’in s’ànima bi faghent ausentos
e sena orvidu ‘olant prus atesu.

B’abbarrat onzi versu intre pabiros
che pabàriu ruju ch’est lughente
in pabarìles umbe cantat zente
isfozende in aèras sos cunsonos
de paràulas craras e atonos
chi s’ampilant in chelos de suspiros.