Poeta
de Antonio Sannia

In sas garas a bolu,
melodias arcanas,
mutos e traggios, modas de valore;
cantos de oriolu,
paraulas galanas,
in su tema 'e s'iscuru e de s'albore.
E cantu fit sa brama,
de currer fatu 'e s' 'ama,
colobrare, faghinde su pastore,
versos de bonaura,
in su lìeru palcu 'e sa natura.

Ischente cun sos mannos,
mastru cun su minore,
as fattu bantu a sa rejone tua;
in tottu cussos annos,
finas chi su dolore,
isfidiadu, 'intradu est a sa cua,
lassande a mesania,
affettu e cumpanzia,
pudadu in joventude ch'at sa frua.
Est tando chi su prantu,
dae su coro est diventandu cantu.

Abbellu fritta e muda,
che mama premurosa,
t'at jamadu, poeta 'e sos prus mannos;
lassandela fiuda
d'ottadas, cuss'isposa.
chi carignadu as po medas annos.
Semper che jaru norte,
finas dopo sa morte,
as a esser po' incher sos affannos,
de custa poesia,
chi che deris non tenet balentia.

S'intendet in s' aera,
su sonu 'e su mudore,
de rimas chi como 'olan in su entu;
est sa musa lizera,
po s'incras benidore,
chi de te at a dare sempre ammentu.


Prima classificata alla XXI edizione del premiu de literadura "Paulicu Mossa" - sezione rima "Peppe Sotgiu" - Bonorva 2019