Pobera e betza
di Gian Piero Agotzi

Pobera e betza ses o bidda mia,
de pannos de dolore ammuntada,
prena de anneu , sola , abbandonada ,
ca partida si ch’est sa zovania.

De su trabagliu pro chircare sa via,
za chi sa titta tua s’est siccada,
sos fizos in su mundu sa filada,
solos e istranzos lead han sena ghia.

Restas isconsolada e affrizida,
dae su prangher de lambrigas piena,
sol isettande a los bider torrare.

Pregas a Deus chi potan agattare
bona sorte e fortuna in terra anzena,
sena affannu ne pena in sa vida.

Iscanu 2-1-2000