Salvatore Ladu

Sos furbos giovaneddos ant cumpresu

Chi pizinnas de vidda, pro promissa

Andana chito a s'inteder sa missa

A su Sacradu de Lorett'Attesu.

Pilos a bentu e rosariu in manu

Cando su primu sole prontu a dare

A cussos ojos in colore 'e mare

Lughe, caentu, alidu 'e veranu.

Che turtureddas prontasa a bolare

A battidos de alas in su coro

Pedinde a sa Madonna, tot'issoro

Unu tesoro de podere amare.

Cando tzertos malinnos a s'iscusa

Alligros brullant e las faghent riere

Cun ojadas d'intentu 'e cherrer biere

Sas meligheddas ch'ana intro sa brusa.

Issas che fogu allutu e divertias

Rispondene a sa taca e los cussizant

Ch'est vanu su disizu, non s'abizant

Chi pro issos sunt frutas proibias.

Su frutu nostru est pigande colore

In froridu zardinu e riservadu

Pedinde solu desser rispetadu

Pro ch'amaduret e tenzat sapore.

Amus intesu, nant sos malandrinos

Chi mannos e ispertos apant b'idu

Perdinde gustu ca s'est apassidu

Diligu frutu in binzas e zardinos.

Eva a s'ornine suo l'at donau

Pro lu gustare in sodisfazione

Senza nde perdere unu pupujone

Menzus asprignu che issaporjau.