Piseddos totta vida
di Minnia Pani

cun giògulos de lughe e de majia
a bortas paret chi ape sonniadu
in s’intimu,in coro cussevadu,
su deris(i) pintadu fit incantu;
ammadrigo lampizos de ispantu
addeschende sos bisos de una ia

Mi fiorin in mente sentimentos
e mi torro a bider dae nou
tando s’isumescia ponzo a prou
carignos,imbèrrios, nd’aprofitto,
e cussa bramosia no isfritto
sos frutos bellos ricos de ammentos

S’anima ischido che prenda amorosa
giogulanos alenos de disizos,
apentos, istralleras, iscurrizos
in laras cun su risu giovanile,
s’ammentu de bisaja in su giannile,
dèchile in su filare, fit modosa.

Daiat vida a su filu filadu
e cussu cabu cherzo islorumare
a sa funes de sole apo a ligare
sas istrinas pienas de sentidos,
ispiràglios giaros, coloridos
de su connotu chi fit impressadu.

Su filu tessìdu, in cussos annos
che licore l’apo assaboriadu
e bido che retratu su passadu
paschende sas pasturas de abbojos,
cussa allegria m’ido galu in ojos,
fin anzenos de tottu sos afannos.

Mi rebuddin in mente cuddos giogos
in su foghile ullutu, ite consolu,
su culilughe pesaiat bolu
sepestaiat sas pupias mias
e sas lunghes arcanas fin sas ghias,
ammajadoras fin de pintos logos.

Ma est finidu su cantu intonadu,
mancadu meda m’est cussu ispassizu,
de torrare piseddu apo desizu;
cun boghes risulanas de recreu

Arribbo che sienda in coro meu
e piseddu in s’itragna so restada.

PRIMU PREMIU - PREMIU LOGUDORO DUAMIZA E NOE