PIETRO, NO PARET BERU
Luisa Scarpa Chessa

No paret beru t’haer incontradu
in mes’e custa neula fumosa,
ses pro me sa sienda preziosa,
chi sa fortuna mi hat regaladu.

Su visu tou m’hat ammaliadu,
postu brama a s’anima isperanzosa,
sa presenzia tua maestosa,
hat custa vida mia cunchistadu.

Mai mi lessas sola bene meu,
da-e mente no mi fuis un istante,
de sa persone mia ses recreu.

Bido su tempus meu delirante,
pro tantu bene ringrazio Deu:
a tie t’abbrazzo ca ses importante.