Salvatore Ladu

Ite canto, ite cantone

Pro sa bella vidda mia,

Una durche melodia

Chi nde peset su puzzone

Ch’est dromminde intro su nidu

Pro mi mantennere ischidu.

Pesa e bola turturedda

Da sa bella innamorada

Pesa e bola a Mamujada

Ca la pesso da indedda

E mi punghene che frizzas

Cussos ojos cussas trizzas.

Ocros in colore ‘e mura

Cun sa ucca risulana

Cantu ses bella e galana

Ti donat sa carre iscura

Che s’istella luminosa

Lavras in colore ‘e rosa.

M’est cunsolu a bos pessare

Chi bos tentat da su monte

Sa chi tenides de fronte

Madonnina de Gonare

Bidda cara, bidda mea

Tentamela cussa Dea.

Cando torro l’appo a dare

Cun sas venas de su coro

Un’aneddu tottu in oro,

Imbenujadu in s’altare,

Pro s’eternu sa promissa

De amare solu a issa.

Umidande m’est su chizu

Su cherveddu vola, vola

Cando pesso chi ses sola

E deo innoghe a disizu

De una mirada tua

De unu vasitu a cua.

In caentu los mantene

Sos carinnos de consolu

In biazu sò a bolu

Pro ti narrer cantu vene,

Cantu lughes a sa die

Non bat sole che a tie.