Per Gorizia

1

Gorizia esta da ora cuntrestrada
tra duos litigantes in su mundu
unu l'hat postu amore dae fundu,
s'atteru de affettu non nde l'hada.
Custu l'hat dogn'istante tragellanda,
cuddu la cunsiderat robba sua,
e pro drittu est gherrende a totto fua
pro chi l'est fiza mancari minore!

2

Cuddas chi sunu in trancas de s'astore,
in presse deven torrare a su nidu...
Troppu tempus s'incurvu nde hat bodidu,
como olan a brazzos de s'amore,
e de sa razza insoro su vigore,
umpare cun sas atteras bighinas
las tirat a sas abbas cristallinas
de Roma, sa perenne ' e sas funtanas.

3

Dae su pettus non pius lontanas
non podene in sa terra istare afflittas,
cuddas ch'àn suttu sas matessi tittas
in su tempus antigu probianas,
e torrana sas abbiles romanas
sos puzzones furados a chircare.
Tottu si cheren sa mama abbrazzare
e si nutrin pro sempre sutta s'ala.

4

Sa trista de Vienna terpe mala
non suzzat pius oso intro su nidu;
ogn'unu a logu sou est remonidu
che puru diamante intro una sala;
Sos fruttos chi ndi essin sun pro gala
E cosa apprezziabile in su mundu,
a bida torran dogni moribondu,
allegran dogni coro italianu!

5

Sos ch'an in venas sambene romanu
deven bundare a su matessi riu,
e posca a mare in ue ogni naviu
de Venezia bella est soberanu!
Tottu fizos s'astringana sa manu
e dansas formen in giru a sa mama,
e azzendat dognunu una fiama,
ch'est su fogu 'e Vesta, lugh'e Deu!

6

Accollu in motu su populu intreu
Su chi fit vinti seculos dormidu!
Pero como ind'un'ora si est ficchidu
e che serpente si est pesadu reu.
No los colas pius barbaru feu
Sos montes de s'Italia difesa:
sun muros forte de naturalesa
e ti serran, Arminiu, s'intrada!

Giuseppe Calvia Mores - giugno 1916

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!