Pensamentu
di Franco Maccioni

In d’unu giardinu ‘e oro
dia cherrer passare
sos annos mios d’etzesa
po ch’istet custu coro
preservadu da ‘ogni male
fintzas a sa die
chi su mundu mi che det leare sa lughe
Cun sa vida attesu
da su logu meu...solu e istimadu.
Attesu,
in paghe santa,
da su mundu malu e ingannadore
po poder intender e godire,
in cussos ultimos alientos mios,
su sabore druche
‘e sa soledade.
E bier dogn’ora
cust’armoniosa dansa ‘e su Criadore,
su corpus meu
dia cherrer biere
perdidu in su silenziu profundu
fintzas a cando
dogni suspiru si che sied’andadu
e, paris cun issu,
sa malintissione ‘e sos omines
e-i sa vinditta mala ‘e custu mundu.

Segnalazione di merito al Concorso Letterario Arborense di Selezione Editoriale Nazionale
Sezione Poesia Sarda Inedita – XI^ Edizione - Anno 1999