PASSOS
“PRIMA CLASSIFICATA AL CONCORSO POESIA MARGHINE”

Passos pressosos, lenos e medidos…
Passos, cantu nde pones no’ los contas!

In zoventude, lestru, los afrontas
sos istrintolzos e sos butorinos:
curres, giampias rios e traìnos
comente chi ti pungan sos isprones.

Passos pressosos, lenos e medidos…
Passos, los contas no’ cantu nde pones!

Bolas cun alas lèbias de puzones
atraessande mares e aeras,
curres peri sas peus camineras
ca ses zòvanu in carres e de mantu.

Passos pressosos, lenos e medidos…
Passos nde pones, no’ los contas cantu!

No’ los illonghias, nò, pius de tantu
cando ch’imbates a sa mesania:
impressados sos passos de una ia,
como pasados, no’ prus atrividos.

Passos, cantu nde pones no’ los contas…
Passos pressosos, lenos e medidos!

Finas sos pes pianghen, consumidos
in sos inghìrios de cuddos vint’annos:
sas aconcadas fatas, como a mannos
gherran cun sos istintos brigonzosos.

Passos, cantu nde pones no’ los contas…
Passos medidos, lenos e pressosos!

Torran pagu seguros, timerosos,
ca cumprendes chi est a finitia:
dias cherrer torrare a pitzinnia
ma sa ‘etzesa t’istringhet sos frenos.

Passos, cantu nde pones no’ los contas…
Passos medidos, pressosos e lenos!

Como torramos pàsidos, selenos,
trambucande a tot’ora, rue rue,
presoneris de cudda umbrosa nue
chi nos est sofocande a tzuf’in bassu.

“Passu…chi no’ ses prus a s’albeschìda
in sos ultimos molios de sa vida!”

  Antoni Piras