N-de asculto passitos,
inter trachetare de abba
chi calca falat
sena ‘entos
e selena iscurret troposa
intre iscurridoglios
chi laccanant carreras
marghinadas dae pedras
de janniles.
N-de intendo sas bullitas
tirriende in s’impredadu,
cando su ‘entu pesadu
muidat abbratzende
d-onzi fiadu isalenadu
e rugat camba o ratu
de pubunzulas froridas
pesende chentu alas
de nuscos e sanietes
chi ruent in ludos
d’andalas sena ‘essida.
Mi punghet sa carena
trapat custu coro
iferchit e lu zirat
in s’anima s’istillu
de su grae pessare,
a lampanas istudadas
ch’iscabulat in corrale
e non b’at inditu
nudda de chircare,
in tudas e mummutu
s’est isolta
sa paràula ‘e imprentare.

17/11/2011