Pane ch'incantas..
di Angelo Pinna


Pane ch'incantas cun sa tua durcura,
e beneittu chi siat su suore
faladu dae sa fronte, cun amore,
de feminas sabias e operosas
chi cun manos frimmas e amorosas
ti dàn sa forma, grazia e bellura.

In sos neuolòsos e frittos manzanos
de cardu profuma tue aùndas
sa mesa 'e sas domos cun bellas tundas
fresas àrridas chi sas dentes toccan,
mentras sos ogros a su Chelu invocan
su pane de onzi die cun sas manos.

Non b'at logu in sa terra in uè tue
mancare non podes, ca nutrimentu
e linfa chi allìviat su turmentu
ses de tantas presentes maladias:
s'in sas mesas mancare tue dìas
canta zente dìat esser rue rue.

De sa linfa 'e sas venas ses funtana,
forza e briu de s'umanu calore,
sinnale potent'e forte de s'amore
chi traìnas in tegus inserradu,
s'amore chi Cristos at mandadu
prò la salvare sa zenìa umana.

In tantas domos podes annotare
su furr'a linna ancor'oe azzesu.
Pagh'e allegrìa bi est'in mesu
de sa famillia tot'afainada.
Die de fadiga a tie cunsagrada,
a sa vida ch'onzi die nos des dare.

Unu bicculu 'e vida fin'a mie
e a nois totu tue assiguras.
e-i sas oras chi si presentan duras
permittis prus serenas de passare.
Paghe, Deus meu, chi mai mancare
potat su pane Tuo donzi die.

In Bolotana, austu de su 2010