Paginas de pedra.

Ap’intesu de pedras ch’an memoria,
sas chi si mustran chentza coro e fritas,
nachi an sonos, paraulas iscritas,
figuras pintas, caras e ammentos,
e chi lugan cun s’abba e, a sos bentos
cunfiden sos segretos de s’istoria,

e ch’in sos muros de pedra assentada,
chi manos agalladas nd’an pesadu,
bi lugat su suore ch’an lassadu
cazadu in pizos diligos e canos,
paginas de antigos iscrianos
in liberos de pedra ammuntonada,

inue b’an signadu ogn’argumentu
chi tempus e natura an preservadu,
a mustrare it’an fatu e manizadu,
su Deus ch’an pregadu e beneitu,
sas domos chi tenian pro abitu,
trastes, capatzidades e talentu.

Picadas pro bellesa e cumpagnia
sun de pedra sas rughes in sas losas,
e de pedra sun anghelos e rosas
chi signalan, che lacanas arcanas,
sa sorte e, sas miserias umanas,
sa fine ’e ogni dolu e disanìa.

Paret chi sigan, mudas a mustrare
operas cun inventos e fainas,
e chi rocalzos cun sas muridìnas,
ammuntadas de rù, edra e cresuras,
s’ispanten, e si gosen de premuras
chi tropu an’imbaradu a lis torrare.

Franco Piga (Romana ‘SS’)
Santu Aìne 2006

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!