Otadas a seberu
di Antoni Màuru Puddu


A s'ammorada

Su di'e Santu Nigola pro ammentu
Pro cantu duro mi l'ap'ammentare:
Bido custa Rosa e la zuto a tentu.
No isco a chie l'apo a paragonare!
Su coro mi at postu in movimentu
E tandho est chi comintzo a l'ammirare.
Santu Nigola est chi m'at azuadu
Chi m'ada custu visu presentadu.



S’abba de su lagu de Acria (Abbissinia)

Onzi sero ndhe preno duos fiascos
Pro la ponner su note a serenare,
Apenas chi su tapu che l'illasco
Che cazosa lu faghet a bolare;
A sa zeuna sempre mi ndhe masco
Ca faghet bene e faghet ingrassare:
Naran chi za est sustantziosa
E totu naran chi est ingrassosa.

 

A su frade mandrone

Frade meu ti mandho custas rigas
Iscritas e las lezas cun amore,
C'a a tie no piaghet sa fadiga,
Su tribagliare l'as a disonore;
Abbàida ite faghet sa frommiga:
Tribàgliat e si 'atit su laore.
No ispetes chi falet dae sa nue:
Dae sa frommiga chi còpies tue.

 

S'iscultas a mie

S'Italia nostra est un'ama
Sentza su controllu 'e su pastore,
Ancora a palas de babbu e mama
Zòvanos mannos de su menzus fiore,
De ispuntìnos e isportos an brama
Lèndheche sa pensione a sos mazores,
Sol'aspetendhe sos dinaris nètoso
Pro dare isfogu a vanos difètoso.

 

A Sarbadore Enne

A mie no domàndhese iscusa,
Ma ti ringràtzio e volentieri;
Finas si faghes su picapedreri
Lu podes fagher chi cantes sa musa;
Però no ti lu les a mestieri,
Comente in Sardigna s'est difusa!
De coro ti lu pedo, Sarbadore:
De mestieri no fetas cantadore!

 

Si mi cheret a fatore

Signora,s'est in chirca 'e afitare
Sas terras pro las dare a laore,
Si mi cheret a mie a fatore
Bi so eo chi las cherzo coltivare,
Ca sa terra l'aferro cun amore,
Ca produit su pane pro campare
E podet istare a coro seguru:
Bi campo eo e bi campat vostè puru.

 

Pro sa limba sarda (1978)

Eo chi so de su Goceanu
Sa limba mia mi est prus a coro,
Si fit a modu 'e bos dare una manu
Za proponia sa 'e Logudoro;
Med'apretziada est sa de Nuoro,
Sa mazor parte sa 'e Campidanu:
Carchi die chi mi càpito 'e passazu
Deo m'agato cun donzi limbazu.