Oe no’
di Salvatore Murgia

Oe no minde pedas de azzudu
ca ne versos ne rimas non t'apporro:
a su cuzzone meu mi-che torro
e mich'adduro asseliada inie
e tue puru faghe che a mie
ne cantes, ne ischrias, restes mudu.

Addures mudu finament'a cando
custa nu''e velenos e turmentos
non benit dissipada da sos bentos
e-i s'aèra torrat crara e netta.
Tando da nou ti esto 'e poeta,
però resta cagliadu fin'a tando.

Cando torrare dèn in custa terra
sa paghe, sa cuncordia e s'amore
e iscumparit odiu e rancore
chi s'omine hat de seru ogadu fora,
tando sa manu t'hap'a dare ancora
ma no mi chirches finas chi b'hat gherra.

E non solu sas gherras de trincea
sun chi faghen cagliada istar'a mie!
Bi sun poi sas gherras de ogni die,
de ricattos, rapinas e tangentes,
de mafia, de drogra e, che serpentes
sos puliticos gherran sa cadrea....

Oh poesia! proriu pro custu
non deves un'istante istare muda,
anzis, sias prus forte, prus azzuda,
pis dezzisa, pis azzardada
ca solu tue, sempre ses bistada
a narrer su ch'est tortu e su ch'est giustu.

Solu tue in sas oras de bosonzu
m'has dadu sempre cunfortu e consolu,
nemancu como no mi lesses solu,
beni, chi totu custu lu bandimos
e dogn'umile versu ch'isciimos
dèt restare in futuru a testimonzu.

(Macomer)

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!