Non t’ispantes ca nudda chelz’ischire
de comente sa vida t’at tratada;
de penas ch’as patìdu, isfortunada
ite as perdidu o devidu coglire.

S’’idet e totu si podet medire
cando ’etas ismarrida ogni mirada,
cumparit in sa janna ch’est tancada
ca non cheres su coro a t’iscaldire.

Ma cando m’as a cherrere iscultare
non t’isetes chi nudda ti cunfide
de penas mias, su meu gherrare.

T’apo a mustrare de cras sos dissignos
garrigos de sentidos e de fide
ch’isetan de s’amore sos carignos.

su 18 de frealzu 2012