Non s’arressat su tempus...
de Giovanni Piga


A s’amicu Poeta Raffaele Piras

Galu iscura predale est custa nue
in su pessare nostru, s’arborinu
non cheret dare luche a su pidinu
de tene, Frade, chi non t’amus prusu,
ca in su pessu eternu ‘e Zesusu
che sole artu como luches tue.

Non bi cheret arbèscher in s’intranna
de su cossolu, galu non si biet
nen s’intendet arrastu, e non bi riet
su coro nostru, semper in s’isetu
d’unu risitu tuo de afetu
chi l’abrandet sa pena ‘e sa sicanna.

Non s’arressat su tempus, no at dolu
nen piedu ’e nemos; surdu e mudu
colat, chene porrire unu saludu
a chie galu est caminande a còdias,
a s’iscuru dassande mentes bòdias
chene sinnu ’e pasu, in oriolu.

Ma s’ammentu ’e tene dat calore
a sos disizos nostros fitianos
bibende su lentore ‘e sos beranos
chi Tue as tintu de sapidoria
chin versos artos, e de poesia
as pintau sa ruche ’e su dolore.

Semper serenu fis, ocros a chelu
mirande su disinnu ’e su Sennore
chene timer de s’Umbra su berbore
rispetosu ‘e sa bida e de sa morte,
ca intre coro unu nidu forte
t’as intèssiu a lucores de Banzelu.

Fis su chercu possente ‘e sa zenia
s’isteddu lucorosu ‘e sa cultura
de custa terra nostra chi sicura
s’ispricabat, chin ocros de ispera,
in s’Arte tua: prenda e galabera
de su mundu, non solu ‘e sa nadia.

Ma oje ses inoche, in s’impuddile
ch’est sa die nobàdile allatande
e chin sa prima luche nos est dande
pro s’ànima carinnos de assentu
chin su respiru tuo: sanu apentu
chi dat calore nobu a su Fochile.

Menzione al XIII premio di poesia “Pietro Casu” - Berchidda, 20 gennaio 2017