Non poto istare

di Benito Saba (2003)

Non poto istare a s'ala 'e sos potentes,
ca non poto olvidare a babbu meu,
forte, onestu, intellizente e bonu,
già pastoreddu,
militare e impiegadu in sa Finantza,
bantu 'e parentes, ma cun pagu 'inari.

Non poto istare a s'ala 'e sos potentes,
ca non poto olvidare a mama mia,
su coro che funtana zenerosa,
femina 'e domo, non istudiada,
de otto fizos mastra e cumpagna
fin'a su duttoradu cun amore.

Non poto istare a s'ala 'e sos potentes:
famine e frittu non poto olvidare,
posca 'e sa gherra, dae domo iffora,
dae idda attesu, in sa tzittade solu,
sa merenda 'e fedales disizende,
dae libberos imprestados istudiende,
in bicculos de pabilu iscriende,
a notte a lughe 'e lampada leggende,
sonnidu, ma cun voluntade manna.

Non poto istare a s'ala 'e sos potentes,
ca non poto olvidare sa pregunta,
a donzi esamen d'universidade,
si de un avvocadu riccu e famadu
- matessi sambenadu - eo fia fizu;
e sa cara iscréttida e iffadada
a sa torrada mia orgollïosa
de babbu archivista a s'Intendentzia.

Non poto istare a s'ala 'e sos potentes,
ca non poto olvidare sos dischentes,
forte afficu pro a mie professore:
costoian povertade e privassiones
in su risu fidutziosu 'e pitzinnia.
E non poto olvidare sas bajanas
e zòvanos incontrados in tottue:
cun rejone non cheren emigrare
e reclaman trabagliu e dignidade.

Medas personas assora potentes
apo connottu in sos annos colados,
eo sempre a s'atter'ala battagliende
pro chie sa 'oghe non podet alsciare.

Ma fintz'a su potente fuet su tempus,
curret e si nde moffat cantonende:
" Passadu est su 'eranu e s'erva est fenu! ".

Peruna b'at pro a mie disamistade,
antzis, est beru e cun fide l'atzetto:
in Gésu Cristu donz'òmine est frade;
ma, coment'Isse in sa vida terrena,
non poto istare a s'ala 'e sos potentes.

Benito Saba

Questa poesia ha conseguito il PREMIO PRESIDENZA PROV. ACLI - SASSARI - F.C. al XV CONCORSO DI POESIA SARDA - ACLI DELLA SARDEGNA - 2003