Non bido s'ora
di Larentu Pusceddu

No at a esser de badas
si cada notte ti sonnio.
Cheret narrer chi turbadu
m'as su coro.
Est un'amore fadadu su chi t'apo
che totu sos amores
chi naschin dae sas bisiones
chi non an ne carre ne sustantzia,
solu mazines chi morin a manzanu
cando sa realidade ti juchet a bucca
su tastu de s'amargura.
E puru sos basos, sos carignos,
s'amore chi arruddidos amus fattu,
in d'unu lettu de nues
apilliadu in s'aèra,
die die berideros
mi benin a sa mente.
E non bido s'ora
chi sa notte ammaliadora
mi che torret, nessi in bisu,
acurtzu a tie…

(Menzione d'onore - Durgale 2005)