Ninna nanna de Anton'Istene
di Antioco Casula

Ninna nanna pizzinnu, ohi ninna nanna
ti leo in coa e canto a duru duru,
dormi pizzinnu dormidi seguru
ca su cane ligadu ap'in sa gianna.

Babbu tuo de pena nd'est pienu
cant'est pienu s'orriu de trigu
ma tue dormi pizzinnu in logu aprigu
cun cara tunda e animu serenu.

Si malos bisos faghes in su sonnu
tue non timas ne piangas mai,
cando t'ischidas t'ischidet mamai
nèndeti contos de nonna e de nonnu.

Unu caddittu t'apo a comporare
cun sedda bella e cun frenos de oro;
des'andare in Caddura e Logudoro
e tott'a tie deven invidiare.

Ti ponz'a coddu soga cun fusile
e duos canes ti peso pro cazza;
canes de Fonne, canes de arrazza
pro ti fagher difesa in su cuile.

E poi ti regalo elveghes chentu
e una tanca tottu fiorida,
una este de pannu colorida
e t'accumpagno finzas a Gennargentu.

E poi ti regalo una fortuna manna
pro chi mai in sa vida apas dolore.
A la cheres? M'iscultet su Segnore!
Ninna nanna pizzinnu, ohi ninna nanna.