Franceschino Satta

Gando in su muundu naschit unu fizu

sa natura diventat prus bertera.

Palan dae su chelu a galabera

rajos d'amore, càndidos che lizu.

Mama tua, d'affettos dispendera,

ti pintat intro ‘e coro una desizu

chi juchet de su sole s'assimizu

chi bolat durche in àgheras d'ispera.

E pro tene, deddè’ sun sas moìnas

ch'in domo tua,a sero e a manzanu,

t'imbentan chin sas alas de su coro.

Un'alipinta intregat a sas frinas

sas notas d'unu cantu soberanu

chi ti laccheddat in casteddos d'oro.