Muros pintos.

Muros pintos, coloridos,
muros de pedra
in carrelas solianas,
muros, testimonzos
de tempos andados,
chi nde torran
ammentos lughidos:
memorias bias
de vidas consumidas
fatu ’e poberas fainas
e nobiles intentos.

Muros e fatzadas antigas,
fiorìdas de lughe e colore,
in beranos chentza edade,
fizos de unu tempus
ingalenadu, e frimmu,
chi mustrat, ancora,
carros a boes
cun rodas mastrinas
e chilcios de atalzu,
e s’intenden
nuscos de zigarru,
de fenu messadu
e suore.
Muros chi sestan camineras
ue s’acheran domos e aposentos,
sonnios betzos e noos,
e bi giogan e inghirian sos bentos
carrende vida noa,
ateras isperas.

Muros pintos,
muros che bandelas…

Franco Piga (Romana ‘SS’)
maju 2006