Mariposa
de Augusto Piras

Fiza ‘e s’iscuru tra sas Mariposas,
lestros amores bendes, ma non bolas
in lampizos de mele illacanadu;
dogni drucore e gosu as olvidadu
in custas tristas notes chi che colas
illuinada in lughes disizosas.

Sola pianghes isperas e bisos
chi como a custu puntu t’ant batida,
in sas banchinas de zente impressida
ch’in bratzos tuos iscutas serenas
andat chilchende a tudare sas penas
in carignos e faltzos paradisos.

Chelos ispalatados da su male
t’ant prommissu pro sa bellesa tua,
prados birdes e abas sena lua
ube crabola areste cultu esseras,
sena gherras ne fàmene e ne feras,
lìbera in mesu ‘e zente coriale.

Ma tempus non t’ant dadu pro bisare.
In iscras annuadas ses paschinde
e cun rànchidas làmbrigas pranghinde
druches ammentas cascos e ispinas
e sas salidas prellas cristallinas
current che riu chi bramat su mare.

Mi frimmo chena soddos pro recreu
e su coddu mi chilcas in amparu.
Tando su nuscu intendo areste e giaru
de libertade sìnchera ch’inoghe
suta su ludu prus non betat boghe
incrabitada a custu mundu feu.

Tratene in cust’iscuru, non t’ispores!
Frobi su prantu e non bistes in pena
ca da brutzos ti ch’’ogo ogni cadena
pro chi, che mariposa, su ch’isperas
potas chilcare in lìberas aeras,
cun cussas alas de tantos colores.

Sos bentos cun carignos delicados
t’ant a ninnare in mantas d’assulenu:
pone in olvidu custu mundu anzenu
torra a nuscare in logos istimados.

1° premio a Orani