Maria bella picioca
de Anghelu de sa Niéra

Maria bella picioca
cando pigas dae funtana
dami abba dae sa broca
si no mi restas bajana.

Ne abba dae sa broca
ne ojos pro t’abbaidare
chircad’atera picioca
pro poder innamorare.

Deo cherzo solu a tie
e non poto reposare
ca ti pesso note e die
solu a tie cherzo amare.

Ses unu grande faularzu
T’apo ‘idu atera ‘asende
acurtzu a su frailarzu
e già ses innamorende.

Non fio deo, pubidda,
Cussu fudi frade meu
Cun d’una pitzinna ‘e ‘idda
fiza de Juanne Seu.

Ahi, cantu t’ido fartzu
Ses propriu unu bagasseri.
Chi ti falet unu frassu
Caminende in su Giomperi.

Pro a tie bellesa rara
Mi ch’eto dae su monte.
Pro a tie custa cara
deo ponzo cun sa fronte.

Si mi faghes custu passu
T’ap’a lear’ a maridu.
Si mi traighes, su tassu
Ti ponzo in binu ‘uddidu.

Su coro meu ti lea
pro lu poder sempr’amare.
bogami custa pelea
Ca ti cherzo cojuare.

Beni ti do s’abba, como,
dae sa broca ‘e giaja mia
manda babbu tou a domo
a s’ora ‘e s’Ave Maria.