Mamuttones
Tonino Fancello

O mamuttone nieddu che-i su moro
ghetta su lovru in custa die fritta
tene s'annada ona prus beneitta
e sos disitzos de prendere in coro.

"Uè sas carreras si pesan fulanas
in su predariu anticu cà isprigas
donzi tempus chi curret chin'istigas
in cussas terras de abbas e fùntanas.

Carottas fides e sagras de focu
tra su fummu chi ‘olat in sa pratta
pistiddos de inicottu in sa saffatta
c h'addurcan s'amargura in cada locu.

Bolan artos sos fummos de ardore
isprican sas frammas in sa muntanna
s'illuminat in terra cada janna
chin fide c'at intessiu su Sennore.

Chin nuscos de ormidda s'archimissa
chi cundit custa notte ch'est galana
e cantat cada fera in donzi tana
e frorit in s'artare cada missa.
Est fìttianu e sicuru chi non ruet
s'alenu beneittu 'e cada gamma
profumat in su sinu cada mamma
de su piseddu chi naschit e suet.

Est chisjna chi ‘olat in s'aera
bardanera chi curret a lugore
e paschen sas ispicas de amore
de su prioradu c'at fattu bandera.

Ses galu sempes tue a tramandare
o Sant'Antoni chi preparas s'annu
de sagras e su foghu meda mannu
e aperis jannas de carrasecare.

In sa chintorza prendes su connottu
de s'antigu prus rustigu tenore
oje est festa manna de folcrore
e tamban sos sonazos d'abbolottu.
Sa maschera'e su tempus a manera
pintada in sa carotta iscarfeddada
pro chi sa fune a lovru ch'est ghettada
prendat in sa Barbagia pache e ispera.

Terzo premio sez.B XXII “CULLEZIU” Sassari