Mamas cando mancades
di Larentu Pusceddu

Mamas cando mancades
non s'alluchet fochile
ne fumajolu s'allupiat
ne tenet sa brasia via.
Peri su focu inchesu
si falat a chisina.
E s'abba non passat sidi
ne s'alimentu at sapore
ne ridet sa criatura
e su betzu dolorzosu pranghet.
E sos tepios muros
ridentes a sa presentzia bostra
guttian umididade
che ocros lacrimosos.
E ne sa luche b'intrat
dae sas jannas surzidas
ca su sole diventat nue,
mamas, cando mancades

(Premiu ispetziale de sa zuria - Tzaramonte 1980)