Magníficat!


di Benito Saba

Coïttende, a sos montes de Giudea
est andada Maria a visitare
Elísabeth, chi, ràïda a betzesa,
Giuanne isettaiat, donu 'e Deus.
De Ispìritu piena, sa sorrasta
su saludu a sa Vírgine at torradu,
currende a l'abbratzare, a boghe manna:
«Inter totu sas féminas ses Tue
beneitta e impare beneittu
est su Fruttu chi as in sas intragnas!
Ite sutzessu est ch’ 'enis a mie
Tue, Mama diciosa ‘e su Segnore?
Mira, intro a su sinu su pitzinnu
totu at gosadu isse pro s'ispaju!
E bïada ses Tue: a s’attuamentu
crees de sa paràula ‘e su Segnore!».

L'at rispostu Maria, ojos a chelu:
«Tota s'ánima mia a su Segnore
alabat e s'ispíritu intro a mie
in Deus santu gosat Sarvadore,
daghi s'umilidade 'e sa teraca
Deus Altíssimu at isperïadu;
sas zenerassïones dae como
totas ana bïada a mi giamare!
E cosas mannas Isse at fattu a mie
s'Illacanadu Amore Onnipotente
e su Nómene eternu Sou est santu:
in sas zenerassiones totas semper
est sa Misericórdia manna Sua
subra sas criaduras timoradas.
E su bratzu potente at impreadu:
ispérdidu e abbovadu at sos supervos
de sos coros issoro in sos meledos;
dae sos tronos altos sos potentes
cun 'irgonza in cramore at boltuladu,
sos ùmiles in glória at esaltadu;
pienadu d'onzi bene at sos famidos,
sos riccos chene sienda at dispacciadu.
Israèl servidore at succurridu,
sa Pïedade Sua ammentende,
cunforme aiat nadu a giajos nostros,
a babbai Abramu nostru mannu
e a s’eréntzia sua, e pro semper! ».

___Comente as prevididu in profetzia,
nois hoe bïada Ti giamamus,
Ti laudamus, Mama, e T’alabamus
Segnora, Tue ses maravizosa!

(2004) (Cfr. Evangéliu 'e Luca, cap. 1, vv. 39-55)