Ma chi’est poeta?

Tue preguntas: “Ma chi’est poeta?”
E crês chi siat custu unu segretu,
cheres ischire chi’est in cuncretu
si tenet donu, gradu e istelleta.
Mi pretendes pretzisa una retzeta
ch’essèra su dutore ’e s’intelletu.

Ma no isco pius de su ch’intendes
e chi s’omine giustu ti presentat,
su ch’in su dare sempre si cuntentat
e cantu narat, tue lu cumprendes:
peraulas connotas chi difendes
ma chi issu ti mustrat e ammentat.

Su ch’in s’intragna morigat, isolvet
lorumos de intrètzidos sentidos,
bogat a pizu ammentos costoidos
chi su tempus remunit e dissolvet,
poi, cun sentimentu, gratu solvet
in versos chi sun da-e coro ’essidos.

Su chi tenet umanu intendimentu
e umana timoria e disizos,
chi mirat de sa vida sos manizos,
de sa sorte, su tristu acanimentu.
Ma nudda est vanu, tot'est argumentu
chi tratat cun rimas e fiorizos.

Ca est totue ch’’idet sa bellesa
chi sa natura ponet in fermentu,
e de issa nde coglit, sempre atentu,
nuscos, colores e tota s'ativesa,
cantat de pensamentu e dechidesa,
de totu s'infinidu firmamentu.

E nudda importat chi mannu o minore
tue lu chelfas invanu pesare,
deves solu cun s’anima tocare
su risu, su piantu, su calore,
gai chi intendas sa fortza, s’amore
ch’in sas peraulas cheret lassare.

Franco Piga (Romana ‘SS’)