Ma Cando?
de Antonio Maria Pinna

Est in ‘ebbadas chi jamen
dultzes momentos e oras
cuddas buccas cascadoras
pro si catzare su fàmen!

Est che trista cantilena
Cussu jamare in s’issoro
Protesta, ch’intro su coro
Lassat mattulos de pena.
Sa Sardigna nd’est piena
De custos tristos lamentos
Chi torran a sos ammentos
Sos annos de carestia,
e che tando in tribulia
est in ‘ebbadas chi jamen!

Cun sas bandelas in punzos
Affiottan sas carreras
Cuddos ch’in sas minieras
An connottu solu abbunzos.
Si nde pesan sos murrunzos
Pro sas fabricas tancadas,
e sas pidigas annadas
porrin arzolas diunzas
dultzes momentos e oras!

Sos lamentos de protesta
Non timen bentu ne frittu
pro catzare s’appetittu
a cuss’ira manifesta
chi un urrida tempesta
si ch’at juttu ‘ogni fàina.
Su pane fattu in coghina
no infurran a s’antiga
e sas dente san in briga
cuddas buccas cascadoras!

Ura mala, sorte indigna
Sardos mios bos at juttu
ca sas tittas ch’azzis suttu
fin de ‘idriga maligna
reduinde sa Sardigna
in eterna teracchìa.
Ma cando sa zente mia
mustrat s’atza de si frangher?
Cando tessa de piangher
pro si catzare su fàmen?
……E non s’idet sa lughe!

Menzione Sez. Rima - Premio di poesia "Tiu Finu" - Romana 2014