M'as torradu s'ispera
de Antonio Sannia

In caminos sintzeros,
mi ses accumpanzande,
sos betzos fini prenos de malesas;
e sentidos lìeros,
costante mi ses dande,
derramas de su coro sas ricchesas. (1)
M'as torradu s'ispera,
m'as dadu vida vera,
sa mia fidi solu 'e falentesas. (2)
E como in su caminu
dammi tottu s'amore ch'as in sinu.

Giughemi a manu tenta,
ube cheres andare,
sighimos de sa luna su lugore;
e cun megus t'appenta,
faghemi sonniare,
in laccanas infustas de lentore,
d'unu manzanu nou,
chi cun s'affettu tou,
at abbacadu penas e dolore. (3)
De su tempus coladu,
malannos e tristesa ch'as bogadu.

Ses bella e ses dèchida, (4)
ses lughe in s'arcu 'e chelu,
ses astru luminosu in sas aeras;
ses amore e ses vida,
ses tottu, ses anelu,
ses lizu in fioridas camineras.

Ses bella che' su sole,
ses giara che' sa luna,
sos isteddos ti faghen ornamentu;
lassa chi ti console,
dandedi a una a una,
sas riccas perlas de su firmamentu.
De Venere s'amore,
cun atteru sabore,
dae coro mi das d'onzi momentu.
Ses mundu de armonia,
leami in bratzos, faghemi de ghia.

In custa vida perdidu mi fia.

 

(1) derramas: profondi
(2) falentesas: astuzie, valentie
(3) abbacadu: acquietato, affievolito, calmato
(4) dèchida: affascinante, avvenente

Terza classificata - 3° Premiu de poesia "Su Casu" - Sindia 2012