M’as nadu “Intra”
di Angelo Pinna

A Peppe Concas,
umile e gentile vena poetica de Bolotana.-

M’as nadu “Intra”, e deo so intradu
a sa domo manna ùe abìtas;
ti appo cun calore saludadu,
su calore mannu chi merìtas.

E sinzeru es su meu calore,
ch’annoto chi a sos pagos versos mios
lis das cara, e de sos cuàdos brios
chircas de nde ìere s’ardore.

Naras ti faghet farta sa cultura,
c’avvesu dae minore a su triballu:
mannu es su chi faghes de irballu
cando cuguzas de poeta sa natura;

ca es poeta chie pompiat attesu,
trazadu dae s’impetu ‘e sas undas
de su suo sentire, gai profundas
chi chie l’iscurtat nde addurat presu.

Chìe es su poeta - naro a bolu -,
in ue es sa poesia, in cale situ
e in su coro de chie at abìtu
pro narrer chi su mere est’ issu solu?

A bias ti penso in sa soledade
de su mannu casteddu ch’as fraigadu,
de poeticos liberos adornadu
gosande de sa tua libertade.

A inìe bi prenetan dae fora
sinnales de unu mundu in abbolottu;
eppùru de ti frangher dae totu
creo non ti cherfas tue ancora,

dae semper a fagher gherra avvesu
de sa vida a totu sas traschìas,
sinnale chi ancora oe imbìas
ca intr’ ‘e coro su fogu es sempr’azzesu.

Es su fogu chi alimentat contìnu
de sa vida una durche visione
fatta de allegrìa, de passione
pro cussas bellas cosas chi as in sinu.

Como chi ses in sa manna edade,
e chi fortes ammentos ses vivìnde,
es pius bassa sa velozidade,
ma sempre cun su camiu t’ìo currinde,

sos campos de su trigu attraessande,
accudinde massazos e pastores,
ne de sa carena sos dolores
paren pagu pesu ti sian dande.

A chent’annos, Peppe! Che-i como
deo ti pota ìer a cu’a tando.
A Chie podet custu li dimando,
onzi orta chi su nomen tuo fontòmo.

In Bolotana, triulas de su 2009.-