Lughidas isperas
di Minnia Pani

Sun culumbas biancas vagabundas
chi regalan isperas de dulzuras
e pesan bolos da-e sas alturas
attraessende mares cun sas undas.

A ogni pitzu de s' umanidade
indeoran de sole sos desizos
a sos pitzinnos candidos che lizos
e innotzentes de orfanidade.

Lizos da-e sos bentos cumbattidos
cun trascias sighidas e affannos,
perdid' han su camin' a pagos'annos
e de amore cheren' impremidos.

S'aggiud' e sos sodales tott' unidos
in diversos settores operende
francadas de isperas sun donende
a minores, e betzos incanidos.

Dende madrighe netta de amore
in sos malos momentos de sas sortes
volontarios unidos, sezis fortes
de sentidos infustos de calore.

Sa virtude ostra est "trasparente"
che abbas cristallinas de funtanas
sas'isperas' e francas fittianas
est su consòlu de s' umana zente.

De afficos hazis bertulas pienas
approendadès tulas de amore
pesades de sa vida su valore
tessides vidas pasidas, serenas.

Bois sezis che lughidas aeras,
aeras chentza nues, profumadas
cun delicados carignos de fadas
bantzigades isettos de isperas.

De sos' umanos sezis ninnadores
de su giassu bellu solianu
che campos fioridos a beranu
de sos afficos sezis binchidores.

TEMA: “UNA FRANCADA DE ISPERA” /2001/ PREMIU LOGUDORO