Leges naturales o divinas.

S’omine, chi trabagliat e cumponet,
manizat e impreat in natura
cosas chi gia bi sun e, cun misura
passos ponet e movet in totue,
ma, sempre in istrintolzos o inue
b’at lacanas chi lìmites l’imponet.

B’at leges naturales o divinas,
sas chi pretzisas paltin bene e male,
chi regulan su motu universale,
vida e morte de ogni criadura,
ogni forma, mannaria e fatura,
e de s’ischire totu sas dutrinas.

S’iscentzia, chi proat e s’atrivit,
serènte cuss’ignotu si collocat,
e cumpidende, totu cheret, tocat,
e cantu podet medit, avalorat,
immaginat, cumprendet o ignorat,
ma nudda podet e, a logu arrivit.

Bene l’ischin dutores, professores
e chie cun s’immensu si cunfrontat
e timerosu, riverente afrontat.
A mie fit bastadu, pro cuntentu,
non de ischire ’e sa vida ogn’intentu
ne sos segretos, mannos o minores,

ma: puite e comente At postu umpare
abba e calore e fritos elementos
e nd’At bogadu a pizu pensamentos,
amore cun sentidos e, cussentzias,
e mizas de zenias, cumpetentzias,
totu su chi podimos cuntemplare.

Franco Piga (Romana ‘SS’)
Santu Aìne 2006